ނޭޝަނަލް އިންޓެގްރިޓީ ޕްލޭނަކީ، ތަންފީޛީ ބާރާއި، ޤާނޫނު ހަދާ މަޖްލިހާއި، ޢަދުލު އިންޞާފު ޤާއިމުކުރުމުގެ ބާރާއި އަދި ދައުލަތުގެ އެހެނިހެން އެންމެހާ އިދާރާތަކާއި އެތަންތަނުގެ މުވައްޒަފުންނާއި، ރާއްޖޭގެ ހުރިހައި ޢާއިލާތަކާއި ފަރުދުންގެ ފެންވަރުގައިވެސް ބަލައިގަންނަ އަދި އޭގެ އަސާސްތަކަށް އިޙްތިރާމްކުރާ އެއްޗެއްކަމުގައި ހެދުމާއި، ޕްލޭންގައި ހިމެނޭ ޕްރޮގްރާމްތަކާއި ޙަރަކާތްތަކަކީވެސް ދައުލަތުގެ ހުރިހައި އިދާރާތަކުން ތަޞްދީޤުކުރާ އަދި ތަންފީޛުކުރާ ކަންކަމުގައި ހެދުމަކީ އެންޓި-ކޮރަޕްޝަން ކޮމިޝަނުގެ މަޤްޞަދެކެވެ.
އިސްވެ ދެންނެވުނު، މައިގަނޑު މަޤްޞަދު ޙާޞިލްކުރުމުގެ ބޭނުމުގައި، ޕްލޭންގައި ހިމެނޭ ޙަރަކާތްތައް، ފުރިހަމައަށް ތަންފީޒުކުރުމުގެ ބޭނުމަށްޓަކައި، ތަންފީޒުކުރާނެ ގޮތުގެ އުޞޫލެއް އެކުލަވާލުމަކީ ވަރަށް މުހިންމު ކަމެކެވެ. މި ގޮތުން، މި ލިޔުމަކީ ނޭޝަނަލް އިންޓެގްރިޓީ ޕްލޭން ތަންފީޒުކުރުމުގައި ޢަމަލުކުރާނެ ގޮތްތަކާއި އުޞޫލުތައް ކަނޑައަޅާ ލިޔުމެވެ. ޕްލޭން ތަންފީޒުކުރުމުގައި މި ލިޔުމުގައި ކަނޑައަޅާ އަސާސްތަކަށް ރިޢާޔަތްކުރަން ވާނެއެވެ.