“ސަން މާމިގިލި” ވަށައިގެން ކުދިކުދި މިޔަރުތަކުގެ އައިނެއް ކޮޅުކޮޅަށް ދިޔައީ ދުވަމުންނެވެ. އެއީ އެ އެއްޗެހި ފޫހިފިލުވާލަން ލިބުނު މުދާގަނޑެއް ކަހަލަ އެވެ. އެކަމަކު މާމިގިލީގެ ޒުވާން ޑައިވަރުންތަކެއް ހިތްވަރުކުރަމުން ދިޔައީ 40 މީޓަރު އަޑީގައި އޮތް ތިން މިލިއަން ރުފިޔާގެ އަގުހުރި ބޮޑު ފެރީ މައްޗަށް ނެގޭތޯ އެވެ.

މައްޗަށް ނަގަން ބޭނުންވާ ބެލޫންތައް އެކި ދިމަދިމާލުގައި ހުރީ ހަރުކޮށްފަ އެވެ. އަދި ތިލަކުރަން ބޭނުންވާ ވާތައް އައްސާ، ލޮނުގަނޑު މައްޗަށް ނަގާފައިވެ އެވެ. އެކަމަކު މިއީ މިދިއަ އަންގާރަދުވަހުގެ ފަތިހު މާލެއާ 34 ކިލޯމީޓަރު ދުރަށް އަޑިއަށް ދިޔަ ދޯނި ނެގޭވަރުގެ އާލާތްތަކެއް ނޫނެވެ. އެހެންކަމުން ދެ ދުވަހުގެ ބުރަ މަސައްކަތުގައި އަދިވެސް އޮޑި ލޮނުގަނޑުން ތިލަކޮށްލެވޭ ވަރެއް ނުވެ އެވެ.

މޫސުން ވަރަށް ގޯސްކޮށް އޮއްވައި، އަދި މުދަލުން ބަރާކޮށްގެން، އދ. އަތޮޅަށް ދަތުރު ފެށި “ސަން މާމިގިލި” އަޑިއަށް ދިޔައީ 80 އަށް ވުރެ ގިނަ ދަތުރުވެރިންނާ އެކު އެވެ. ނަމަވެސް އެއިން އެއްވެސް މީހަކަށް ގެއްލުމެއް ނުލިބި ވަނީ ސަލާމަތްކޮށްފަ އެވެ.

އެމްއެންޑީއެފުން ބުނާ ގޮތުގައި ދޯނިން ދަތުރުކުރި މީހުންގެ ސީދާ އަދަދު އެނގޭނެ ގޮތެއް ނެތެވެ. އޭގެ ސަބަބަކީ ބަންގްލަދޭޝްގެ އެތައް ބަޔަކު ވެސް ދަތުރުވެރިންގެ ތެރޭގައި ހިމެނުމެވެ. ގެއްލިގެން އެއްވެސް މީހަކު ރިޕޯޓްކުރިކަން އެނގިފައެއް ނުވެ އެވެ.