އެންޓި-ކޮރަޕްޝަން ކޮމިޝަނުން އިސްނަގައިގެން، ތައްޔާރު ކުރަމުންދާ ނޭޝަނަލް އިންޓެގްރިޓީ ޕްލޭން އެކުލަވާލުމާއި ތަންފީޒުކުރުމާބެހޭ މަޢުލޫމާތު ބައްދަލުވުމެއް ޖަމްޢިއްޔާ ޖަމާޢަތްތަކާ އެކީ 21 ޖަނަވަރީ 2016 ވީ ބުރާސްފަތި ދުވަހު އެންޓި-ކޮރަޕްޝަން ކޮމިޝަނުގައި ބާއްވައިފިއެވެ.
ތަފާތު އެކިއެކި ޖަމްޢިއްޔާ ޖަމާޢަތްތަކުގެ އިސްވެރީންގެ އިތުރުން އެންޓި-ކޮރަޕްޝަން ކޮމިޝަނުގެ މެމްބަރުންވެސް ބައިވެރިވެވަޑައިގެންނެވި މި ބައްދަލުވުމުގައި، ނޭޝަނަލް އިންޓެގްރިޓީ ޕްލޭންގެ މައިގަނޑު އަސާސްތަކާއި މަޤުޞަދުތަކާއި، ޕްލޭންގައި ހިމެނޭ ސިޔާސަތުތަކާއި، ސްޓްރެޓެޖީތައް އަދި ބައެއް ނަމޫނާ ޙަރަކާތްތަކަށް ބަލާލެވި، ސުވާލާ ޖަވާބަށް ޚާއްޞަ ވަގުތުކޮޅެއް ހިމަނާލެވުނެވެ. އަދި، ނޭޝަނަލް އިންޓެގްރިޓީ ޕްލޭން ކާމިޔާބު ކަމާއެކު ކުރިއަށް ގެންދިއުމަށް ކުރެވިދާނެ ކަންތައްތަކާ ބެހޭގޮތުންނާއި، ނަޒާހަތްތެރިކަން ކުރިއެރުވުމުގައި ޖަމްޢިއްޔާ ޖަމާޢަތްތަކާ ގުޅިގެން ކުރިއަށް ގެންދެވިދާނެ ޙަރަކާތްތަކާ ބެހޭގޮތުން މި ބައްދަލުވުމުގައިވަނީ މަޝްވަރާ ކުރެވިފައެވެ.
މި ބައްދަލުވުމުގައި އެޑްވޮކޭޓިންގ ދަ ރައިޓްސް އޮފް ޗިލްޑްރަންސް، ސޮސައިޓީ ފޯ ހެލްތް އެޑިއުކޭޝަން، ޖަރނީ،ހޯޕް ފޯ ވިމެން، ޔޫތް އިންޓެގްރިޓީ ނެޓްވަރކް،ދިވެހި ޔޫތު މޫވްމަންޓް، މޯލްޑިވްސް ޑިމޮކްރަސީ ނެޓްވަރކް، އިސްލާމިކް ފައުންޑޭޝަން އޮފް ދަ މޯލްޑިވްސް، ޖަމްޢިއްޔަތުއް ސަލަފް، މަހަލްދީބް ފައުންޑޭޝަން، އަދި ޖުނިއާ ޗެމްބަރ އިންޓަރނޭޝަނަލް ކާފު ޗެޕްޓަރ އިން ބައިވެރިވެ ވަޑައިގެންނެވިއެވެ.