އެންޓި-ކޮރަޕްޝަން ކޮމިޝަނުން އިސްނަގައިގެން، މިހާރު ތައްޔާރު ކުރަމުންދާ ނޭޝަނަލް އިންޓެގްރިޓީ ޕްލޭނާ ބެހޭގޮތުން ޓްރާންސްޕޭރެންސީ މޯލްޑިވްސް(ޓީ.އެމް) އާއެކު މަޝްވަރާ ބައްދަލުވުމެއް ބާއްވައިފިއެވެ. މި ބައްދަލުވުން ބޭއްވުނީ 20 ޖަނަވަރީ 2016 ވީ ބުދަ ދުވަހު އެންޓި-ކޮރަޕްޝަން ކޮމިޝަނުގައެވެ.
ޓީ.އެމްގެ އިސްވެރީންގެ އިތުރުން އެންޓި-ކޮރަޕްޝަން ކޮމިޝަނުގެ މެމްބަރުންވެސް ބައިވެރިވެވަޑައިގެންނެވި މި ބައްދަލުވުމުގައި، ނޭޝަނަލް އިންޓެގްރިޓީ ޕްލޭންގެ މައިގަނޑު އަސާސްތަކާއި މަޤުޞަދުތަކާއި، ޕްލޭންގައި ހިމެނޭ ސިޔާސަތުތަކާއި، ސްޓްރެޓެޖީތައް އަދި ބައެއް ނަމޫނާ ޙަރަކާތްތަކާ ބެހޭގޮތުން މަޝްވަރާކުރެވިފައި ވެއެވެ. އަދި ރާއްޖޭގެ ކޮރަޕްޝަންގެ ޙާލަތު ރަނގަޅުކުރުމަށް އޭސީސީން ކުރަމުންދާ މަސައްކަތްތަކާ ބެހޭގޮތުން ޓްރާންސްޕޭރަންސީ މޯލްޑިވްސްއާ މަޢުލޫމާތު ޙިއްސާކޮށް، އެފަރާތުން ފާހަގަކުރަން ބޭނުންވާ ކަންތައްތަކާ ބެހޭތުން އޭސީސީން މަޢުލޫމާތު ހޯދިއެވެ.
މިހާތަނަށް ދައުލަތުގެ 34 އިދާރާގެ އިސްވެރިންނާ މިޕްލޭނާބެހޭ މަޢުލޫމާތު ޙިއްސާކުރެވިފައިވާއިރު، ކުރިޔަށް އޮތް ތަނުގައި މިޕްލޭންގެ ހަތަރުވަނަ ދެލިކޮޕީ ފައިނަލްކޮށް ތަންފީޒުކުރުމުގެ ޢަމަލީ މަސައްކަތް ފެށުމަށް އެންޓި-ކޮރަޕްޝަން ކޮމިޝަނުންދަނީ ތައްޔާރުވަމުންނެވެ.