ނަޒާހަތްތެރިކަމުގެ ޤައުމީ މަޝްރޫޢު

ޒިމްބާބުވޭގެ އިޤްތިޞާދީ ޙާލަތު ދަށަށްގޮސް ގިނަ ރައްޔިތުން ދަނީ އެމީހުންގެ ޢާއިލާތަކުގެ ޒަރޫރީ ބޭނުންތައް ފުއްދުމަށްޓަކައި އެހެން ޤައުމުތަކަށް މަސައްކަތް ހޯދުމަށް ހިޖުރަކުރަމުންނެވެ. ނަމަވެސް ނިކަމެތި ރައްޔިތުން މިދެކޭ ހުވަފެންތައް ޙަޤީޤަތަކަށްނުވެދަނީ މަދެއްކޮށެއްނޫނެވެ. ކޮރަޕްޝަންގެ ބަނަ ވިލާގެ ސަބަބުން، އެތައް ބައެއްގެ ހަޔާތަށް އަނދިރިކަން ވެރިވެގެންދަނީ މަދުފަހަރަކު ނޫނެވެ. ލީރޯއީއަށް ދިމާވި ޙާދިސާއަކީވެސް ހަމަ މިފަދަ ކަމެކެވެ!

ވަޒީފާއެއް ހޯދުމަށްޓަކައި ލީރޯއީ ދިޔައީ ކޮންމެދުވަހަކުވެސް އެތަކެއް މަސައްކަތެއް ކުރަމުންނެވެ. މީގެތެރެއިން އެއްދުވަހަކު، ވަޒީފާއެއް ލިބޭތޯ އެކިތަންތަން ބަލަމުން ދަނިކޮށް، މަގެއްގެ މަތީގައި ހުރި އިޝްތިހާރެއް ލީރޯއީއަށް ފެނުނެވެ. އޭގައި ވަނީ ކަރަންޓު، ނަރުދަމާ އަދި ވަޑާމުގެ މަސައްކަތުގައި ފުންނާބު އުސް ފަރާތްތަކަށް އެންގޯލާގައި މަސައްކަތް ކުރުމުގެ ފުރުޞަތު އޮތް ވާހަކައެވެ. އެއާއެކު އެވަޒީފާ ހޯދުމަށް އެންގޯލާއަށް ދިޔުމަށް އޭނާ ނިންމިއެވެ. އޭނާ ބުނިގޮތުގައި ރެކްރޫޓްމަންޓް ކުންފުންޏަކުން ވިސާ ޕްރޮސެސް ކުރުމަށް އޭނާޔާ އޭނާގެ ފަސް ރަޙްމަތްތެރީން އެހީވިއެވެ. އަދި މިކުންފުނީގެ އެހީގައި ލީރޯއީ އެންގޯލާއަށް އެތެރެވިއެވެ.

އެންގޯލާގައި މަސައްކަތް ކުރާތާ މަހެއްހާ ދުވަސް ފަހުން، ލީރޯއީ އާއި އޭނާގެ އެކުވެރީންނަށް އެމީހުންނަށް ދޫކޮށްފައިވާ ވިސާއަކީ ހިއުމެނިޓޭރިއަން ވިސާކަން އެނގިއްޖެއެވެ. އެމީހުންނަށް ވިސާ ހަމަޖައްސައި ދިނުމަށް އުޅުނު ރެކްރޫޓްމަންޓް ކުންފުނިން ބުނެފައިވަނީ ޒިމްބާބުވޭގެ ރައްޔިތުންނަކީ ވަރަށް ނިކަމެތި ފަޤީރު ބައެއް ކަމުން ފައިސާގެ ބަދަލުގައި މަދު ކާއެތިކޮޅަކަށް އެމީހުން މަސައްކަތް ކުރާނެކަމަށެވެ.

އުފަން ޤައުމާއި ދުރުގައި އާމްދަނީ ހޯދާނެ ގޮތެއް ނެތުމުން އެތައް ބަޔަކަށް މިކަމުގެ ތެރޭގައި ތާށިވެ އުޅެން ޖެހުމަށް މަޖުބޫރުވެފައިވެއެވެ. އެއީ އެގޮތަށް އުޅެން ދެކޮޅު ހަދައިފިނަމަ ވަޒީފާ ގެއްލި އުޅޭނެ ތަނެއްނެތި މަގުމަތިވެދާނެތީއެވެ. ލީރޯއީ އާއި އޭނާގެ އެކުވެރީންނަށް ޒިމްބާބުވޭއަށް އަނބުރާ އާދެވުނީ އެންގޯލާގައި ހުންނަ ޒިމްބާބުވޭގެ އެމްބަސީ މެދުވެރިވެގެންނެވެ.
ޒިމްބާބުވޭއަށް އެނބުރި އާދެވުމާއެކީ ލީރޯއީ ދިޔައީ ޓްރާންސްޕޭރެންސީ އިންޓަރނޭޝަނަލްގެ ޒިމްބާބުވޭގައި ހުންނަ ޤާނޫނީ ލަފާދޭ މަރުކަޒަށެވެ. އަދި އެމީހުންނަށް ދިމާވި ޙާދިސާ ކިޔައިދީ އެ ރެކްރޫޓްމަންޓް ކުންފުޏާ ބެހޭގޮތުން ޝަކުވާ ހުށަހަޅާނެ ގޮތްތައްވެސް އޮޅުންފިލުވިއެވެ.

މިމަރުކަޒުން ލީރޯއީއާއި އޭނާގެ އެކުވެރީންނަށް ޗީފް އިމިގްރޭޝަން އޮފިސަރ ގެ އޮފީހަށް ރެކްރޫޓްމަންޓް ކުންފުންޏާ ދެކޮޅަށް މައްސަލަ ހުށަހެޅިއެވެ. ލީރޯއީމެން އެދުނީ ރެކްރޫޓްމަންޓް ކުންފުންޏަށް އެއްވެސް ވެރިފިކޭޝަން ޕްރޮސެސްއަކާ ނުލާ ވިސާ ދޫކުރުމަށް އޮޕްރޭޓް ކުރެވުނީ ކިހިނެއްކަން ބަލައި ދިނުމަށެވެ.

މިހާރު ކުންފުނީގެ އެންމެ އިސްކޮށް އުޅޭ ފަރާތް ތަޙުޤީޤަށް ހާޒިރުކޮށް މައްސަލަ ބަލައި، ކޯޓަށް މައްސަލަ ހުށަހަޅައި، މައްސަލަ ވަނީ ކޯޓު މަރުޙަލާގައެވެ. ލީރޯއީއާއި އޭނާގެ އެކުވެރީން މިމައްސަލަ ކޯޓާ ހަމަޔަށް ގެންގޮސްފައިވާތީ ނުހަނު އުފާކުރެއެވެ. އަދި އެމީހުން ބޭނުންވަނީ ކޯޓުން މައްސަލަ ނިންމާ ކުންފުނިން އިޙްމާލުވި ފަރާތްތަކާ މެދު ފިޔަވަޅު އެޅިގެން ދިޔުމެވެ.
ލީރޯއީ އާއި އޭނާގެ އެކުވެރީންނަށް އިންޓަރނޭޝަނަލް އޯގަނައިޒޭޝަން ފޯ މައިގްރޭޝަން އިން އަމިއްލަ ވިޔަފާރިއެއް ފަށައިގަތުމަށް ފައިސާގެ އެހީ ލިބިގެންދިޔައެވެ. މިއަދު އޭނާއަކީ އާމްދަނީ ލިބޭ ފުދިގެން ދިރިއުޅޭ މީހެކެވެ. ލީރޯއީއަކީ ވަރަށް ނަސީބުގަދަ މީހެކެވެ. ނަމަވެސް މިފަދަ މައްސަލަތަކުގައި ތާށިވާ އެހެންމީހުންގެ ނަސީބު އެހާ ރަނގަޅެއް ނޫނެވެ!

ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ޑްރީމް ޖޮބް” މި ލިޔުމުގެ ދިވެހި ތަރުޖަމާއެކެވެ. މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” ދީގެން ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.
http://www.transparency.org/news/story/dream_job

2011 ވަނަ އަހަރު ޕާކިސްތާނުގައި ހިނގި ފެންބޮޑުވުމުގެ ކާރިޘާގައި 400 އަށް ވުރެ ގިނަ މީހުންގެ ފުރާނަ ގެއްލިފައިވެއެވެ. އަދި ދެލައްކައެއްހާ މީހުންގެ ގެދޮރު ނެތިގެންގޮސް ހާލުގައި ޖެހިފައިވެއެވެ. އެހެން ކާރިޘާތަކެކޭވެސް އެއްފަދައިން މިކަމުގެ އެންމެ ބޮޑު އަސަރެއްކުރީ ފަޤީރު ނިކަމެތީންނަށެވެ. ދެމިގެންދިޔަ ފެންގަނޑު ތެރޭ އެމީހުންގެ ގެތައް އުފުލި، ބިމާ ހަމަވެގެން ދިޔުމުގެ ސަބަބުން އެމީހުން އުޅެމުން އައީ ވަރަށް ހާލުގައެވެ. ބޯހިޔާވަހިކަމެއް ނެތި، ފާޚާނާ ކުރާނެ ގޮތެއް ނެތި، ތޮއްޖެހިފައިވާ ރެފިއުޖީ ކޭމްޕުތަކުގައެވެ. ހާލުގައި ޖެހިފައިވާ މި މީހުންނަށް އަސާސީ ބޭނުންތައް ފުއްދުމަށް އެހީ ހަމަޖެއްސެނު ނަމަވެސް އަހަރެއް ފާއިތުވެ ދިޔައިރުވެސް ގިނަ ބަޔަކު ދިރިއުޅެމުން ދިޔައީ ވަރަށްވެސް ފަޤީރު ޙާލަތުގައެވެ. ކަރީމް އަޙުމަދު (އަސްލު ނަމެއްނޫން) ވެސް އުޅެމުން އައީ މިފަދަ ޙާލެއްގައެވެ.

ކަރީމަކީ ވެސް ފެންބޮޑުވުމުގެ ކާރިޘާގައި އޭނާގެ ގެދޮރު ގެއްލިފައިވާ ނިކަމެތި ފަޤީރެކެވެ. އޭނާގެ އަތުގައި އެއްވެސް ކަހަލަ ބިމެއް ނުވަތަ މުދަލެއް ނެތުމުން އޭނާޔަށް ސަރުކާރުގެ ޚާއްސަ ސްކީމެއްގެ ދަށުން 10000 ރުޕީސް (100 ޔޫ.އެސް ޑޮލަރު) ލިބުމަށް ހަމަޖެހިފައިވެއެވެ. މި ފައިސާ ފޯރުކޮށްދިނުމަށް ހަމަޖެހިފައިވަނީ ޚާއްސަ ޑެބިޓް ކާޑެއް މެދުވެރިކޮށްގެންނެވެ. ނަމަވެސް ކަރީމް، އޭނާޔަށް ހަމަޖެހިފައިވާ ކާޑް ބަލައި ދިޔުމުން އޭނާޔަށް އޮފީހުން އެންގީ އޭނާގެ ކާޑް އެހެންމީހަކު ގެންގޮސްފައިވާ ކަމެވެ. ޢާއިލާގެ ބޭނުންތައް ފުއްދައި ދިރިއުޅުން އަލުން އާރާސްތުކުރުމަށް އޭނާޔަށް އެފައިސާ ލިބުން ވަރަށް މުހިއްމެވެ. އޭނާ ގޮތް ހުސްވެ މާޔޫސްވެފައި ވަނިކޮށް ޕާކިސްތާނުގައި ހުންނަ ޓްރާންސްޕޭރެންސީ އިންޓަރނޭޝަނަލްގެ އެންޓި-ކޮރަޕްޝަން އަދި ޤާނޫނީ ލަފާދޭ މަރުކަޒުގެ ޚަބަރު އޭނާޔަށް ލިބިގެން ދިޔައެވެ.

“މިހާ ގިނަ ފައިސާ މީހުންނަށް ފޯރުކޮށްދެމުން ދާއިރު ކޮރަޕްޝަން އޭގެ ތެރެއަށް ވަދެ ފައިސާ ނަހަމަ ގޮތުގައި ބޭނުންކުރުމަށް މަގު ފަހިވެގެން ދިޔުމަކީ ހަމަ ފަހަރުގައި ވެދާނެ ކަމެއް” މަރުކަޒުގައި މަސައްކަތް ކުރަމުން އަންނަ އެސިސްޓެންޓް ޕްރޮޖެކްޓް ކޯޑިނޭޓަރ އަޝްފާޤް ބުންޏެވެ. “އަހަރުމެން މަސައްކަތް ކުރަނީ މީހުންނަށް ލިބެންޖެހޭ ހައްޤުތަކަކީ ކޮބައިކަން ބުނެދިނުމަށާއި، ނިޒާމް ފެއިލްވެ ލިބެންޖެހޭ ޙައްޤުތައް ނުލިބުމުން އެފަދަ ކަންކަމާއި ބެހޭގޮތުން ވާހަކަ ދައްކާ ޝުޢޫރު ފާޅުކޮށް އަޑު އުފުލުމަށް އެހީތެރިވެ ދިނުމަށެވެ.”

ޤާނޫނީ ލަފާދޭ މަރުކަޒާ ހަމަޔަށް މިފަދަ މައްސަލަތައް ގެނެސްފައިވަނީ ހަމައެކަނި ކަރީމްއެއް ނޫނެވެ. ގާތްގަނޑަކަށް 50 އަށް ވުރެ ގިނަ ޝަކުވާ ހުށަހެޅިގެން ދިޔައެވެ. ކަރީމްއެކޭ އެއްފަދައިން އެހެން މީހަކަށް ކާޑް ދޫކޮށްގެން ޝަކުވާ ހުށަހެޅުނު އިރު ބައެއް މީހުންގެ ޝަކުވާއަކީ ލިބެންޖެހޭ ފައިސާގެ ދެބައި ކުޅަ އެއްބައިވެސް ލިބިފައިނުވުމެވެ. ޝަކުވާ ހުށަހެޅި ފަރާތްތަކުގެ ބަޔާން ނެގި ޑޮކިއުމެންޓް ތައްޔާރު ކުރެވި ޑިޒާސްޓަރ މެނޭޖްމަންޓާ ބެހޭ ޑިޕަރޓްމަންޓަށް ފޮނުވުނެވެ.

ނަމަވެސް އެ ޑިޕަރޓްމަންޓުން ފުރަތަމަ ދިނީ ބީރު ކަންފަތެކެވެ. އެހެންކަމުން މަރުކަޒުން ޑިޕަރޓްމަންޓަށް ދެވަނަފަހަރަށް މައްސަލަ ފޮނުވިއެވެ. ދެވަނަ ސިޓީ އާއެކީ ސަރުކާރުން ޑިޒާސްޓަރ މެނޭޖްމަންޓް ޑިޕަރޓްމަންޓަށް ޝަކުވާތަކާ ބެހޭގޮތުން ފިޔަވަޅު އެޅުމަށް އެންގިއެވެ. އަދި އެމައްސަލަތަކާ ގުޅޭ ތަފްޞީލް ރިޕޯޓެއް ފޮނުވުމަށް އެންގިއެވެ. ކުޑަ ދުވަސްކޮޅެއްގެ ތެރޭގައި ޑިޕަރޓްމަންޓުން ޤާނޫނީ ލަފާދޭ މަރުކަޒަށް ގުޅިއެވެ. އަދި މައްސަލަތައް މުރާޖަޢާކޮށް، ކާޑުތައް ތައްޔާރުކުރެވިފައިވާ ކަމަށްވެސް އެ ފަރާތުން މަރުކަޒަށް މަޢުލޫމާތު ދިނެވެ.

ކަރީމަށް އޭނާގެ މައްސަލައަށް ޙައްލެއް ލިބިގެން ދިޔައީއެވެ. ނަމަވެސް އަދިވެސް އެތައް މައްސަލައެއް ނުނިމި ހުރުމުން މަރުކަޒުން މަސައްކަތް ކުރަމުން ދަނީ ކޮރަޕްޝަނާއި، ރިޝްވަތާއި ބެހޭގޮތުން ރައްޔިތުން ހޭލުންތެރިކުރުމަށެވެ. “މިއީ ވަރަށްވެސް ބޮޑު މަސައްކަތެއް” ޓީ.އައި ޕާކިސްތާނުގެ އެގްޒެކެޓިވް ޑިރެކްޓަރ ސާދް ރަޝީދު ވިދާޅުވިއެވެ. “ނަމަވެސް މި ފައިސާ އަކީ ރައްޔިތުންގެ ދިރިއުޅުން އަލުން އާރާސްތުކުރުމަށް ވަރަށް މުހިއްމު އެއްޗެއް. އަޅުގަނޑުމެންގެ މަސައްކަތް މިކުރަނީ މިފައިސާ ލިބެންޖެހޭ ފަރާތްތަކަށް ލިބެމުންދާކަން ކަށަވަރު ކުރުމަށް.”

ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ސަވައިވިންގ ދި ފްލަޑްސް” މި ލިޔުމުގެ ދިވެހި ތަރުޖަމާއެކެވެ. މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” ދީގެން ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

http://www.transparency.org/news/story/surviving_the_floods

ސޮލޮމޮން އައިލަންޑް ގެ ރައްޔިތެއް ކަމަށްވާ އުމުރުން 35 އަހަރުގެ ބުންޔާމީނަށް (ނަން ބަދަލުކުރެވިފައި) އެ ޤައުމުގެ ސަރުކާރުން ގަސްގަހާގެހި އާލާކުރުމުގެ މަޝްރޫޢެއްގެ ދަށުން ދޫކުރާ ފައިސާ ލިބުމުން ވަރަށް އުފާކުރިއެވެ. އޭނާއަކީ ކުޑަކުޑަ އަވަށެއްގެ މާރުކޭޓް ސަރަޙައްދުގައި މަސައްކަތް ކުރަމުން އަންނަ މީހެއްކަމުން، ލިބޭ ކުޑަކުޑަ އާމްދަނީން ކިރިޔާ ދެކޮޅު ޖެއްސެނީއެވެ. ކަން މިހެން ހުރުމާއެކު އޭނާޔަށް މި ލިބުނު ފައިސާގެ ސަބަބުން އާމްދަނީ އިތުރުވެ އަދި އޭނާ ކުރާ މަސައްކަތުގެ ސަބަބުން އޭނާ އުޅެބޮޑުވި ސަރަޙައްދުގެ ތިމާވެށި ޙިމާޔަތް ކުރުމުގެ މަގު ތަނަވަސްވެގެން ދިޔައެވެ. ފައިސާ ދޫކުރާ އޮފީހުން ބުންޔާމީނަށް އެންގީ އެ ފައިސާ އޭނާއަށް ދޫކުރާނީ ޕްރޮވިންސުގެ ވެރިރަށުން ކަމަށެވެ. އެހެންކަމުން، އޭނާ މި ފައިސާހޯދުމަށް ފޮށިތަންމަތި ބަނދެ ދަތުރު ކުރުމަށް ބޭނުންވާ ޓިކެޓްވެސް ނެގިއެވެ. ނަމަވެސް އޭނާ އެރަށަށް ދިޔުމުން، ޤައުމުގެ ވެރިކަންކުރާ ރަށް ހޮނައިރާއަށް ދިޔުމަށް ކަމާ ޙަވާލުވެ ހުރި އޮފިސަރު އެންގިއެވެ.
ބުންޔާމީންގެ ރަށުން ވެރިކަންކުރާ ރަށް ހޮނައިރާއަށް ކުރަންޖެހޭ ދަތުރަކީ ދިގު ދަތުރަކަށް ވެފައި ވަރަށް އަގުބޮޑު ދަތުރެކެވެ. ދަތުރުގެ ޓިކެޓުގެ އަގަށް އެކަނިވެސް ހަމައެކަނި 500 ސޮލޮމޮން އައިލޭންޑާ ޑޮލަރު (68 ޔޫ.އެސް.ޑޮލަރު) ޚަރަދުކުރަން ޖެހެއެވެ. ހޮނައިރާގައި ހުރުމާއި ކެއުމަށް ޚަރަދުކުރާނެ ފައިސާ ބުންޔާމީނުގެ އަތުގައި ނެތުމުގެ ސަބަބުން، އޭނާއަށް ޖެހުނީ، ގިނަ އަދަދެއްގެ މީހުން ދިރިއުޅޭ ތިމާގެ މީހެއްގެ ގޭގައި މަޑުކުރާށެވެ. މިކަހަލަ ދިގު އުނދަގޫ ދަތުރަކަށް ފަހު، އުންމީދާއެކު، މަޝްރޫޢަށް ލިބެންޖެހޭ ފައިސާ ބަލާ ދިއުމުން އަދި ފައިސާ ލިބިފައި ނެތްކަމަށާއި ދެ ހަފްތާ ފަހުން އަލުން އައުމަށް ބުންޔާމީނަށް އެންގިއެވެ. ދެ ހަފްތާ ފަހުން އަނެއްކާވެސް، ފައިސާ ބަލާ ބުންޔާމީން ދިއުމުންވެސް، އޭނާއަށް ލިބުނީ ހަމަ މި ޖަވާބެވެ. ތިންމަސް ފާއިތުވެގެން ދިޔައިރުވެސް ބުންޔާމީނަށް ފައިސާ ލިބުމުގެ ކޮޅުމައްޗެއް ނުފެނުނެވެ.
ބުންޔާމީނަށް ލިބެންޖެހޭ ފައިސާ ނުލިބި ގިނަ ދުވަސްތަކެއް ވުމުން، ކަންބޮޑުވުން ފާޅުކުރުމުގެ ގޮތުން އޭނާ ދިޔައީ “ފޮރެސްޓްރީ” އާ ބެހޭ މިނިސްޓްރީއަށެވެ. މިނިސްޓްރީއިން ލިބުނީ އޭނާ އުއްމީދު ނުކުރާ ފަދަ ޖަވާބެކެވެ. މިނިސްޓްރީގެ އޮފިޝަލް ބުނިގޮތުގައި ތިން މަސް ކުރީން އޭނާގެ ރަށުގައި ހުރި ކަމާ ބެހޭ އޮފީހުގެ އޮފިސަރު ވަނީ އެފައިސާ ބެހުމަށްޓަކައި ގެންގޮސްފައެވެ. މި މައްސަލައާ ގުޅިގެން މިނިސްޓްރީއިން ލަފާދިނީ ސޮލޮމޮން އައިލެންޑްގައި ހުންނަ ޓްރާންސްޕޭރެންސީ އިންޓަރނޭޝަނަލްގެ ޤާނޫނީ ލަފާދޭ މަރުކަޒުގެ އެހީ ހޯދުމަށެވެ. ޤާނޫނީ ލަފާދޭ މަރުކަޒުން އޭނާގެ ރަށުގައި ހުރި ކަމާ ބެހޭ އޮފީހުގެ އޮފިސަރާ ގުޅައި ވާހަކަ ދެއްކިއެވެ.
“މިފަދަ މައްސަލަތަކަކީ މިތަނުގައި ޢާއްމުކޮށްވެސް ދިމާވާ މައްސަލަތައް. ނަމަވެސް އޮފިސަރުންނާމެދު ޢާއްމުން ޖެހިލުންވުމާއި އަދި މައްސަލަ ބެލުމަށް ހޭދަވާ ޚަރަދު ބޮޑުވުމުގެ ސަބަބުން މައްސަލަ ރިޕޯޓްކުރާ މީހުން ވަރަށް މަދު” ބުންޔާމީންގެ ފަރާތުން ޤާނޫނީ ލަފާދޭ މަރުކަޒުން ގުޅި ޝެފަރޑް ލަޕޯ ބުންޏެވެ.
“އަޅުގަނޑުމެން ގުޅައި، ބުންޔާމީނުގެ ރަށުގައި ހުރި ކަމާ ބެހޭ އޮފީހުގެ އޮފިސަރަށް ދެންނެވިން މިފަދަ ފަންޑުތައް ނަހަމަ ގޮތުގައި ބޭނުންކުރުމަކީ ކޮރަޕްޝަންގެ ޢަމަލެކޭ! އަދި އޭގެ ސަބަބުން ކޮރަޕްޝަންގެ ދަޢުވާ އޭނާގެ މައްޗަށް އުފުލިދާނެއޭ! އޭނާ އެފައިސާ ނަހަމަ ގޮތުގައި ބޭނުން ކުރާކަމަށް ވަގުތުން އިންކާރުކުރި. އަދި އެ ފައިސާބެހުމުގެ މަސައްކަތުގައި އަވަދިނެތި އުޅޭ ކަމަށްވެސް ބުނި.” ޝެފަރޑް ބުންޏެވެ. ” އަޅުގަނޑުމެން ގުޅިތާ 15 މިނެޓްވެސް ނުވަނީސް ބުންޔާމީނަށް ގުޅައި ފައިސާ ބަލައި އައުމަށް އެދިއްޖެ! އަދި އޭގެ ދެތިން ދުވަސް ތެރޭ ބާކީ ތިބި މީހުންނަށްވެސް ފައިސާ ލިބގެން ދިޔަ” ޝެފަރޑް އިތުރަށް ފާހަގަ ކުރިއެވެ!
ސޮލޮމޮން އައިލެންޑްގެ ޓްރާންސްޕޭރެންސީ އިންޓަރނޭޝަނަލްގެ ޤާނޫނީ ލަފާދޭ މަރުކަޒުން މިހާރުދަނީ ސަރުކާރާ ގުޅިގެން ޑިވެލޮޕްމަންޓް އޮފިސަރުން ނަޒާހަތްތެރިކަމާ އަމާނާތްތެރިކަމާއެކީ މަސައްކަތްކުރާ ބަޔަކަށް ހެދުމަށް ތަމްރީންތަށް ހިންގުމަށް ރާވަމުންނެވެ. އަދި ހަމައެއާއެކީ އެ މަރުކަޒުންދަނީ އެކިއެކި އަވަށްތަކަށް ގޮސް މަސައްކަތުބައްދަލުވުންތައް ބޭއްވުމަށް ތައްޔާރުވަމުންނެވެ. އެއީ ގާތްގަނޑަކަށް 80 އިންސައްތަ އާބާދީ ދިރިއުޅެނީ މިފަދަ ހިސާބުތަކުގައި ކަމަށް ވާތީއެވެ. މި ހާދިސާއަށް ފަހު، ބުންޔާމީންފަދަ މީހުން ޤާނޫނީ ލަފާދޭ މަރުކަޒަށް ޝުކުރު އަދާ ކުރުމަށް ވަރަށް ގިނައިން އައިސްފައިވެއެވެ. ޝެފަރޑް ބުނިގޮތުގައި “އޭނާޔަށް ލިބެންޖެހޭ ފައިސާތަށް ލިބުމުން އޭނާ ހުންނަނީ ވަރަށް އުފާވެފަ. އަދި އޭނާ ދަނީ އޭނާގެ އަވަށުގެ ރައްޔިތުންނަށް ސޮލޮމޮން އައިލެންޑްގެ ޓްރާންސްޕޭރެންސީ އިންޓަރނޭޝަނަލްގެ ޤާނޫނީ ލަފާދޭ މަރުކަޒުން އެހީވެވޭނެ ގޮތާއި ބެހޭ ގޮތުން މީހުންނަށް މަޢުލޫމާތު ދެމުން”

ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “އައިލެންޑް ސަޕޯޓް” މި ލިޔުމުގެ ދިވެހި ތަރުޖަމާއެކެވެ. މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” ދީގެން ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.
http://www.transparency.org/news/story/island_support

ހުޅަނގު އައްސޭރީގައި ދިރިއުޅެމުން އަންނަ ފަލަސްތީނުގެ ގިނަ ރައްޔިތުންނަކީ އިންތިހާއަށް ފަޤީރު ބައެކެވެ. އޭގެތެރެއިން ގިނަ މީހުންނަކީ ސިއްޙީ އަދި ތަޢުލީމީ ވަޞީލަތްތައް ލިބެން ނެތް ބައެކެވެ. ރަށުގެ ގިނަ ގެތަކާއި މަގުތަކާއި ނަރުދަމާގެ ނިޒާމުތައް ވަނީ ވަރަށް ބޮޑަށް މަރާމާތުކުރަން ޖެހިފައެވެ. މިކަންކަން ޙައްލުކޮށް އަސާސީ ޚިދުމަތްތައް ރައްޔިތުންނަށް ފޯރުކޮށްދިނުމަށްޓަކައި އަވަސް ފިޔަވަޅުތަކެއް އަޅަންޖެހިފައިވެއެވެ. ނަމަވެސް، ފަލަސްތީނުގެ ސަރުކާރުން މިކަންކަމަށް ކަނޑައަޅާފައިވާ ބަޖެޓު ނަހަމަ ގޮތުގައި ބޭނުންކުރަމުންދާ ކަމުގެ އަޑުތައް ގަދަވެ ފެތުރެން ފެށުމުން، މިކަމާ ގުޅިގެން ދައުލަތުގެ ޚަރަދުތައް ބެލެއްހެޓޭނެ ރަނގަޅު ނިޒާމެއް ޤާއިމްކުރުމަށް އެކި ފަރާތްތަކުން ވަނީ ފަލަސްތީނު ސަރުކާރަށް ގޮވާލާފައެވެ.

ޓްރާންސްޕޭރެންސީ އިންޓަރނޭޝަނަލްގެ ފަލަސްތީނު ގޮފި (އަމަން) އިން ފަލަސްތީނުގެ ރައްޔިތުންނާއި ގުޅިގެން ކުރި މަސައްކަތްތަކުގެ ތެރެއިން، އެފަރާތަށް ލިބުނު ޝަކުވާތަކުގެ ތެރޭގައި، ސަރުކާރުގެ ވެހިކަލްތައް ނަހަމަ ގޮތުގައި ބޭނުން ކުރަމުންދާ ކަމުގެ އެތަކެއް ޝަކުވާއެއް ހިމެނެއެވެ. 2009 ވަނަ އަހަރު އެކަނިވެސް، ސަރުކާރު މުވައްޒަފުންގެ ތެރެއިން 6000 އަށް ވުރެ ގިނަ މުވައްޒަފުން ދައުލަތުގެ ކާރު އަމިއްލަ ބޭނުމަށް ގެންގުޅެފައިވެއެވެ. އަދި ކާރުގެ ތެލާއި ބެލެހެއްޓުމަށް އެކަނިވެސް ދައުލަތުގެ މާލިއްޔަތުން 18 މިލިޔަން ޔޫރޯ ޚަރަދުކޮށްފައިވެއެވެ. މިފަދަ ގިނަ ކާރުތައް ބޭނުންކުރެވެމުން ދިއައީ އަމިއްލަ ދަތުރުތަކަށާއި ރަހުމަތްތެރީންނާއި ގާތްތިމާގެ މީހުންގެ އެކިއެކި ބޭނުންތަކަށެވެ. އަދި، ބައެއް ކާރުތައް ފަލަސްތީނުން ބޭރަށް ގެންގޮސްފައިވާ ކަމަށްވެސް ރިޕޯޓުކުރެވިފައިވެއެވެ.

އަމަން އިން މިމައްސަލަތައް މިނިސްޓްރީ އޮފް ޓްރާންސްޕޯޓަށް ހުށަހެޅިއެވެ. މިނިސްޓްރީން ބުނިގޮތުގައި އެ ފަރާތަށް އެކަމާ ބެހޭގޮތުން އެނގިފައިވެއެވެ. އަދި މިނިސްޓްރީގެ ވަޞީލަތްތައް މަދުވުމުގެ ސަބަބުން މިނިސްޓްރީއިން މިފަދަ ކަންކަމުގައި ފިޔަވަޅު އެޅުމަށް ދަތިތަކާ ކުރިމަތިލާން ޖެހިފައިވެއެވެ. އެހެންކަމުން، އަމަން އިން މިނިސްޓްރީއާ ގުޅިގެން މިފަދަ މައްސަލަތައް ޙައްލުކުރުމަށް މަސައްކަތް ކުރަންފެށިއެވެ. އެގޮތުން ވަރުގަދަ މީޑިއާ ކެމްޕޭނެއް ފަށައި ރޭޑިއޯ ޕްރޮގްރާމްތަކާއި ބިލްބޯޑުތަކާއި ނޫސް މަޖައްލާތަކުގައި މިވާހަކަ ލިޔެ، ރައްޔިތުންނަށް މިކަންކަން އަމަންގެ ހޮޓްލައިނަށް ގުޅައި ރިޕޯޓުކުރުމަށް ހިތްވަރުދިނެވެ.
މިކެމްޕޭން ވެގެން ދިޔައީ ވަރަށް ކާމިޔާބު ކެމްޕޭނަކަށެވެ. ކުޑަ ދުވަސްކޮޅެއްގެ ތެރޭގައި މިކަންކަމާ ގުޅޭ 150 ޝަކުވާ އަމަން އިން ބަލައިގަނެ، މިނިސްޓްރީއަށް ތަޙްޤީޤުކޮށް ފިޔަވަޅުއެޅުމަށް ފޮނުވިފައިވެއެވެ. ނަމަވެސް މީގެ ސަބަބުންވެސް މިމައްސަލައަށް ދާއިމީ ޙައްލެއް ނުލިބިދާނެތީ، އަމަންއިން ފަލަސްތީނުގެ ބޮޑުވަޒީރު، ސަލާމް ފައްޔާދުގެ އަރިހުން މިމައްސަލައިގައި ނިޒާމީ އިތުރު ފިޔަވަޅުތަކެއް އެޅުމަށް އެދުނެވެ.
ނަތީޖާއެއްގެ ގޮތުން ފަލަސްތީންގެ މިނިސްޓަރުންގެ ކައުންސިލުން ނިންމި ނިންމުމަކުން ބޮޑުވަޒީރާއި ބޮޑުވަޒީރުގެ ނައިބު ފިޔަވައި އޮފީސް ނޫން ވަގުތުތަކުގައި ސަރުކާރުގެ އެއްވެސް އުޅަނދެއް ބޭނުން ކުރުން މަނާކުރެވުނެވެ. އަދި 2010 ވަނަ އަހަރު 6200 އަށް ވުރެގިނަ ކާރު ސަރުކާރުގެ މުވައްޒަފުން އަތުން އަތުލެވުނެވެ. މީގެ ތެރެއިން ބައެއް ވެހިކަލްތައް ސަރުކާރު ބޭނުމަށް ބޭނުންކުރިޔަސް ގިނަ އުޅަނދު ވިއްކަން ހަމަޖެހިފައިވާކަން ފާހަގަކުރެވެއެވެ.
އަމަން އިން ފާހަގަ ކުރި ގޮތުގައި ފަލަސްތީނުގެ ސަރުކާރުގެ ޚަރަދުތައް ރަނގަޅުގޮތުގައި ކޮށް، ދައުލަތުން ކަންކަން ކުރުމުގައި ހާމަކަމާއެކީ ކަންކަންކުރުމުގެ ރޫހު އިތުރުކޮށް ނަޒާހަތްތެރިކަން ކުރިއެރުވުމުގައި ކުރަން ޖެހިފައިވާ މިންނަތް މަސައްކަތުގެ ތެރެއިން މިކަން ހާޞިލް ކުރެވުނީ ވަރަށްވެސް ކުޑަ މިންވަރެކެވެ.

ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ބެލެންސިންގ ދި ބަޖެޓް” މި ލިޔުމުގެ ދިވެހި ތަރުޖަމާއެކެވެ.
މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” އާއެކު ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

http://www.transparency.org/news/story/balancing_the_budget