ނަޒާހަތްތެރިކަމުގެ ޤައުމީ މަޝްރޫޢު

ގުއަޓެމާލާގެ ސަރުކާރު ތެރޭގައި އުފެދިފައިވާ، ޢާއިލީ ގުޅުން އޮންނަ ފަރާތްތަކަށް މަޤާމު ދިނުމުގައި އިސްކަންދިނުމުގެ ވަބާ ނައްތާލުމުގެ ބޭނުމުގައި 2002 ވަނަ އަހަރު އާ ޤާނޫނެއް އެކުލަވާލިއެވެ. މި ޤާނޫނުގައި، މޭޔަރުންނަށް އެ ފަރާތްތަކުގެ ތިމާގެ މީހުންނަށް ވަޒީފާ ދިނުމަކީ ޤާނޫނާ ޚިލާފު ކަމެއްކަމުގައި ކަނޑައެޅިއެވެ. ނަމަވެސް، ގުއަޓެމާލާގެ ރައްޔިތެއްކަމަށްވާ ހުއާން*އަށް، މޭޔަރުން މި ޤާނޫނަށް ޢަމަލް ނުކުރާކަން ފާހަގަ ކުރެވުނެވެ. އަދި އޭނާގެ އަވަށުގައި މޭޔަރުގެ ތިމާގެ މީހުންގެ ތެރެއިން ދިހަވަރަކަށް މީހުންނަށް ވަޒީފާދީފައިވާކަމަށް ޝައްކުކުރެވުނެވެ. މިމީހުންގެ ތެރޭގައި އޭނާގެ އަނބިމީހާއާއި ދަރީންވެސް ހިމެނެއެވެ.
ހުއާން އޭނާގެ ޝައްކުކުރުންތައް އަވަށުގެ ކޮންޓްރޯލަރ ޖެނެރަލްގެ އޮފީހަށް މައްސަލައެއްގެ ގޮތުގައި ހުށަހެޅިއެވެ. އެއޮފީހަކީ އަވަށު ފެންވަރުގައި، ދައުލަތުގެ އޮފިޝަލުންނާއި އޮފީސްތަކުން ދައުލަތުގެ މުދާ ބޭނުންކުރުމާއި އަދި ދައުލަތުގެ ޚަރަދުތައް ހިނގާ ނުހިނގާ ގޮތް ބެލުމުގެ ޒިންމާ މަތިކުރެވިފައިވާ އޮފީހެކެވެ. ހުއާން ކޮންޓްރޯލަރ ޖެނެރަލްގެ އޮފީހަށް މައްސަލަ ހުށަހެޅުމުން އެކަމާމެދު ފިޔަވަޅެއް ނޭޅޭނެކަމަށް މީހުން ބުނަމުންދިޔައެވެ. އަދި އޭގެ ސަބަބުން ހުއާންއަށް ތަފާތު ނުރައްކާތަކާ ކުރިމަތިލާންޖެހޭނެކަމަށް ވެސް މީހުން ބުނަމުން ގެންދިޔައެވެ. ހުއާން މިމައްސަލަ ނޫސްވެރީންނާ ހަމަޔަށް ގެންދިޔުމުން، އެހީވުމުގެ ބަދަލުގައި އެމީހުންވެސް އެކަމަށް އިންކާރުކުރިއެވެ.
ގުއަޓެމާލާގައި ހުންނަ ޓްރާންސްޕޭރެންސީ އިންޓަރނޭޝަނަލްގެ ގޮތްޕާ ބެހޭގޮތުން ހުއާންއަށް އެނގުމުން އެމީހުންގެ އެހީ ހޯދުމަށް ހުއާން ޤަސްދުކުރިއެވެ. އަދި އެމީހުންގެ ލަފަޔާ އެއްގޮތަށް މޭޔަރުގެ އޮފީހަށް ވަޒީފާގެ އެއްބަސްވުންތަކުގެ ކޮޕީ ހޯދުމަށް އެދި ސިޓީ ހުށަހެޅިއެވެ. މޭޔަރުގެ އޮފީހުން ޖަވާބެއް ނުލިބި ގިނަ ދުވަސްތަކެއް ވުމުން ގުއަޓެމާލާގައި ހުންނަ ޓްރާންސްޕޭރެންސީ އިންޓަރނޭޝަނަލްގެ ގޮފިން އެއޮފީހާ ގުޅިއެވެ. އަދި ހުއާން ބޭނުންވާ ލިޔެކިޔުންތައް ހޯދުމުގައި އެހީތެރިވެދިނެވެ.
ޢާއިލީ މީހުންނަށް ވަޒީފާދޭ ކަމުގެ ކިތާބީ ހެކީގެ ގޮތުގައި އެ އެއްބަސްވުންތައް ހިފައިގެން ހުއާން ކޮންޓްރޯލަރ ޖެނެރަލްގެ އޮފީހަށް ދިޔުމުން އެކަން ޤަބޫލުނުކޮށް ހުއާން ފޮނުވާލީއެވެ. އެ އޮފީހުން ބުނިގޮތުގައި މޭޔަރުގެ އޮފީހުގައި ތިމާގެ މީހަކު މަސައްކަތް ކުރާކަމުގެ ހެއްކެއް އެ އެއްބަސްވުންތަކަކުން ނުފެނެއެވެ.
މައްސަލަ ކުރިޔަށް ނުގޮސް މަޑުޖެހޭހެން ހީވުމުން ގުއަޓެމާލާގައި ހުންނަ ޓްރާންސްޕޭރެންސީ އިންޓަރނޭޝަނަލްގެ ގޮފިން އެޤައުމުގެ ވެރިރަށުގައި ހުންނަ ކޮންޓްރޯލަރ ޖެނެރަލްގެ އޮފީހަށް ދިޔައެވެ. އަދި އެމީހުން އަވަށު މޭޔަރުގެ އޮފީހާ ބެހޭގޮތުން އޮޑިޓެށް ކުރެވޭނެކަން ޔަޤީންވުމާހަމައަށް އެމައްސަލައާވެގެން އުޅުނެވެ.
މިއީ ހުއާންއަށް ލިބުނު ކުރިއެރުމެއްކަމުގައިވީ ނަމަވެސް އޭގެ ސަބަބުން ހުއާންގެ ފުރާނަޔަށް ނުރައްކާވާ ހިސާބަށް ކަންކަން ދިޔައެވެ. ކޮންޓްރޯލަރ ޖެނެރަލްގެ އޮފީހަށް ދިޔަ މަގުމަތީގައި އޭނާ ހަތިޔާރުއެޅި މީހުންތަކެއް އައިސް ބަހަކަށް އެރުވިއެވެ. އަދި ވަކި ހިސާބަކުން ކާރަކަށް އަރުވައި ވަލުތެރެއަށް ގެންގޮސް އޭނާގެ އަތުގައި ހުރި ތަކެތި ވަގަށްނަގައި ފޭރިގަނެ މައްސަލައާ މެދު އަޅާނުލުމަށް އިންޒާރުދިނެވެ. މީގެ އިތުރުންވެސް ބަޑި ހިފައިގެން ތިބި ބަޔަކު ހުއާންއާ ކުރިމަތިލައި މައްސަލައާ ވެގެން އުޅެފިނަމަ މަރާލާނެ ކަމުގެ އިންޒާރުދިނެވެ.
ނަމަވެސް، ފަސްޖެހުމެއްނެތި ހުއާން މައްސަލައާ ގުޅޭ ކަންތަކާ އުޅެމުންދިއައެވެ. ނަތީޖާއަކަށް ވެގެން ދިޔައީ ކޮންޓްރޯލާ ޖެނެރަލް އޮފީހުން ހިންގި ތަޙްޤީޤު ނިންމައި މޭޔަރުގެ އޮފީހުގައި ތިބި މޭޔަރުގެ ތިމާގެ ފަސް މީހުން ވަޒީފާއިން ވަކިކުރުމަށް ގޮވާލިއެވެ. މިކަމާ ގުޅިގެން ފިޔަވަޅު އަޅާނެކަން ޔަޤީން ކުރުމުގެ ގޮތުން ގުއަޓެމާލާގައި ހުންނަ ޓްރާންސްޕޭރެންސީ އިންޓަރނޭޝަނަލްގެ ގޮފިން މިވާހަކަތައް މީޑިއާގައި ފަތުރަންފެށިއެވެ. އެހާ ޙިސާބުން މޭޔަރުގެ އޮފީހުގައި މަސައްކަތް ކުރަމުން އައި އޭނާގެ ތިމާގެ މީހުން އިސްތިއުފާ ދިނެވެ.
*އަޞްލު ނަމެއް ނޫން
———————————————————————————————————-
ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ފެމިލީ އެފެއާޒް” މި ލިޔުމުގެ ދިވެހި ތަރުޖަމާއެކެވެ.
މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” އާއެކު ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

http://www.transparency.org/news/story/family_affairs

ނިވެން*ގެ ވަޒީފާއިން އޭނާ ވަކިކުރުމުން، އެވަޒީފާއިން ވަކިކޮށްފައިވަނީ ބޭއިންސާފުން ކަމަށް ބުނެ ހުށަހެޅި މައްސަލައަށް އަވަސް އަދި އިންޞާފުވެރި ޙައްލެއް ލިބޭނެކަމަށް އޭނާ ހީކުރިއެވެ. ނަމަވެސް، ކޯޓުގެ އިޖުރާޢާތުތައް ދިގުދެމިގެން ލަސްވަމުންގޮސް އެއްވެސް ޙައްލެއް ނުލިބި 11 އަހަރު ފާއިތުވެއްޖެއެވެ. ނަތީޖާއެއްގެ ގޮތުން ނިވެންއަށް ކުރިމަތިލާންޖެހުނީ ނަފްސާނީ އަދި މާލީ ބޮޑެތި ގޮންޖެހުންތަކަކާއެވެ.
މައްސަލައަށް އެއްވެސް ޙައްލެއް ނުލިބުމުން، ޓްރާންސްޕޭރަންސީ އިންޓަރނޭޝަނަލްގެ ކްރޮއޭޝިއާ ގޮފީގެ ފަރާތުން ނިވެން އެހީތެރިކަމަށް އެދުނެވެ. ނިވެން އަތުގައި ޤާނޫނީ ވަކީލެއްގެ އެހީތެރިކަން ހޯދާނޭ ފަދަ ނެތްއިރު ކްރޮއޭޝިއާގެ ޤާނޫނުން ދައުލަތުގެ ފަރާތުން ފޯރުކޮށްދޭ ޤާނޫނީ ވަކީލެއްގެ އެހީތެރިކަމަށްވެސް ނިވެން ޝަރުޠު ހަމައެއް ނުވިއެވެ. އޭނާއަށް ވަޒީފާދީގެން ކުރިން އުޅުނު ފަރާތަށް ކޯޓުތެރޭގައި މައްސަލަ ދިގުދެންމުމުގެ ފުރުޞަތު ލިބެން މެދުވެރިވި އެއް ސަބަބަކީ ނިވެންގެ ކިބައިގައި އޭނާގެ ނަފްސު ކޯޓުގައި ރަނގަޅަށް ތަމްސީލުކުރުމަށް ބޭނުންވާ ޤާނޫނީ ޤާބިލްކަން ނެތުމެވެ.
ޓްރާންސްޕޭރަންސީ އިންޓަރނޭޝަނަލްގެ ކްރޮއޭޝިއާ ގޮފިން ނިވެންއަށް ބޭނުންވި ޤާނޫނީ އެހީތެރިކަން ފޯރުކޮށްދިނެވެ. އަދި އެކަށީގެންނުވާ ސަބަބުތަކަށްޓަކައި ކޯޓުގައި މައްސަލަ ދިގުދެމިގެން ދާކަމުގެ މައްޗަށް ބިނާކޮށް މައްސަލަ އަވަސްކޮށްދިނުން އެދި އިސްތިއުނާފުކުރުމަށް އޭނާއަށް އެހީތެރިވެދިނެވެ. މާ ގިނަދުވަހެއް ނުވެ، މައްސަލަ އަވަސް ނިޔާގެ މައްސަލައަކަށް އަލުން ގިންތިކުރެވުނުކަމަށް ކޯޓުން ނިވެންއަށް އަންގައިފިއެވެ. މަހެއްހާ ދުވަސްތެރޭ އިސްތިއުނާފުގެ މަޖިލީހުގެ އަޑުއެހުމެއް ބޭއްވުނެވެ. އަދި، ޝަރީޢަތުން ނިވެންއަށް ވަޒީފާދީގެން ކުރިން އުޅުނު ފަރާތުގެ މައްޗަށް އޭނާއަށް ކާމިޔާބުވެގެން ދިޔައެވެ.
އަދި، ނިވެން އަށް ލިބުނު ގެއްލުމުގެ ބަދަލު ނަގައިދެވުނެވެ. ހަމައެއާއެކު، ކްރޮއޭޝިއާގައި ޤާނޫނީ ވަކީލުންނަށް ދޭންޖެހޭ ފީ ބޮޑުވުމާއި، ދައުލަތުން ފޯރުކޮށްދޭ ޤާނޫނީ އެހީތެރިކަމަށް ޝަރުޠުހަމަވުމަށް އުނދަގޫކަމުން ކުދިކުދި މައްސަލަތައްވެސް ކޯޓުތެރޭގައި އެތަކެއް ޒަމާނަކަށް ލަސްވަމުންދާ ދިއުމާމެދު އާންމުންގެ މެދުގައި ބޮޑު ބަހުސެއް މިދުވަސްވަރު ފެށިގެންދިއައެވެ. ނިވެން އަށް މި ދިމާވި ހާދިސާއިން ފާހަގަވެގެން ދިޔަކަމަކީ އެ ޤައުމުގެ ޝަރުޢީ ނިޒާމަށް ބޮޑެތި ހެޔޮ ބަދަލުތަކެއްގެ ބޭނުން ޖެހިފައިވި މިންވަރެވެ.
*އަޞްލު ނަމެއް ނޫން
…………………………………………………………………………………………………………………………………………..
ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ފައިންޑިންގ ދަ ވޭ ހޯމް” މި ލިޔުމުގެ ދިވެހި ތަރުޖަމާއެކެވެ.
މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” އާއެކު ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

http://www.transparency.org/news/story/justice_cant_wait

ދުވަސް ވަރަކީ 1970 ގެ އަހަރުތަކެވެ. ޒިޔާދު އޭނާގެ ދިރިއުޅުން ލުބުނާނުގެ ވެރިރަށް ބޭރޫތުގެ ރަށްބޭރުގައިވާ އަވަށެއްކަމަށްވާ ބަރީހްގައި ބިނާކުރަމުންދިޔައެވެ. އޭނާގެ ޢާއިލާގެ އެތައް ޖީލެއް އެތަނުގައި ދިރިއުޅެފިއެވެ. ޒިޔާދުމެން މިހެން ދިރިއުޅެމުން ދަނިކޮށް ލުބުނާނުގައި ދާޚިލީ ހަނގުރާމައެއް ފެށުނެވެ. ހަނގުރާމައިން ސަލާމަތްވުމަށް ޒިޔާދާއި އޭނާގެ ޢާއިލާވެސް ސަހަރު ދޫކޮށް އަވަށްޓެރީންނާއެކީ އެހެން ހިސާބުތަކަށް ހިޖުރަކުރިއެވެ. އަދި ހަނގުރާމަ ނިމި އަނބުރާ އާދެވޭ ވަރުވުމުން ސަހަރަށް އެނބުރި އައިއިރު، އެމީހުންގެ ބިމުގައި އެހެންބަޔަކު ވަނީ ވަޒަންވެރިވެފައެވެ. މިއީ އަލަށް ލުބުނާނުގައި ދިމާވާ ކަމެއް ނޫނެވެ.

ދާޚިލީ ހަނގުރާމަތަކާއި، 2006 ވަނަ އަހަރު އިޒްރޭލާ ދެމެދު ކުރެވުނު ހަނގުރާމައާއި، ރެފިއުޖީ ކޭމްޕުތަކަށް ދޭހަމަލާތަކާއި، އަދި މީގެ އިތުރުން އެކިއެކި ހަމަނުޖެހުންތަކުގެ ސަބަބުން 6 ލައްކައަށް ވުރެ ގިނަ މީހުން ލުބުނާނުގެ އެކި ހިސާބުތަކުގައި ގެދޮރު ނެތިފައި އެބަތިއްބެވެ. މިފަދަ ހަނގުރާމަތަކުގެ ސަބަބުން ބިމުގެ މިލްކުވެރިކަމާ ހެދި ތަފާތު އިތުރު ހަމަނުޖެހުންތައް ހިނގައިފައި އެބަހުއްޓެވެ. މިކަމަށް އެޅިދާނެ ފިޔަވަޅެއް ކަމަށް ބަލައި ލުބުނާނުގެ ސަރުކާރުން ވަނީ “މިނިސްޓްރީ އޮފް ޑިސްޕްލޭސްމެންޓް” (ގެދޮރު ގެއްލިފައިވާ ފަރާތްތަކާ ބެހޭ މިނިސްޓްރީ) އެއް ޤާއިމްކޮށްފައެވެ. މިމިނިސްޓްރީ އިން ދައުލަތުގެ ފައިސާ ބޭނުންކޮށްގެން ޢާއްމުންނަށް އެމީހުންގެ ގެތަކަށް އަނބުރާ އައުމަށް އެހީތެރިވެދެއެވެ. އަދި ލިބިފައިވާ ގެއްލުމުގެ ބަދަލު ހޯދައިދެއެވެ.

މިގޮތުން ޒިޔާދުގެ ރަށްކަމުގައިވާ ބަރީހުގައި ގެދޮރުގެއްލިފައިވާ މީހުންނަށް ފައިސާ އެހީ ދިނުމަށްވެސް އެ މިނިސްޓްރީއިން ނިންމާފައިވެއެވެ. ނަމަވެސް ޖެހިގެން ހުރި އަވަށްތަކަށް ފައިސާ ލިބިގެންދިޔައިރުވެސް ބަރީހުގެ ރައްޔިތުންނަކަށް ފައިސާއެއް ނުލިބެއެވެ. 2014 ވަނަ އަހަރުގެ ކުރީކޮޅު ޒިޔާދު އޭނާއަށް ލިބެންޖެހޭ ފައިސާ ހޯދަން މިނިސްޓްރީގައި އެދުމުން، މިނިސްޓްރީން އޭނާ ގާތު ބުނަމުން ދިޔައީ ފަންޑުގައި ފައިސާ ނެތް ކަމަށެވެ. އަދި ހޯދަން އެދުނު ފައިސާ ޙަވާލުކުރެވިފައިވާ ކަމަށް ލިޔުންތަކުން ދައްކާ ކަމަށެވެ. ކަންމިހެން ހުރުމާއެކު ފައިސާ ޚަރަދުވީ ކިހިނެއްކަމާމެދު ސުވާލު އުފެދިގެންދިޔައެވެ.

މިނިސްޓްރީ އޮފް ޑިސްޕްލޭސްމަންޓް އުފެދުނީއްސުރެ އެތަނާމެދު ދިޔައީ ތަފާތު ތުހުމަތުތައް ކުރެވެމުންނެވެ. އެގޮތުން 1999 ވަނަ އަހަރު މިނިސްޓްރީ އިން ވަކިވެފައިވާ މުވައްޒަފުންގެ ނަމުގައި މުސާރަ ނަގައި ކާރަކާއި އެހެނިހެން ވަޞީލަތްތައް ގަތުމުގެ ތުހުމަތުތައް އެތަނުގެ ޑިރެކްޓަރ ޖެނެރަލްގެ މައްޗަށް ކުރެވި ތަޙުޤީޤު ހިންގިފައިވެއެވެ. މީގެ އިތުރުން ސިޔާސީ ބޭފުޅުން ވޯޓުލުމުގެ ކުރީން އިންތިޚާބުތަކުގައި ވޯޓު ގަތުމަށް ގެދޮރުވެރިކުރުމުގެ ފަންޑު ބޭނުންކުރަމުންދާކަން ރިޕޯޓުކުރެވިފައިވެއެވެ. އަދި ހަމައެހެންމެ ބައެއް ޢާއްމުންގެ ފަރާތްތަކުން ދޮގު މަޢުލޫމާތު ދީގެން މަކަރާ ހީލަތުން ފައިސާ ހޯދަމުން ދިޔައެވެ. މިކަމުގެ ހިތި ނަތީޖާ ތަޖުރިބާ ކުރަންޖެހެނީ ޙާލުގައިޖެހި ގެދޮރު ވީރާނާވެފައި ތިބި ނިކަމެތީންނަށެވެ.

ޒިޔާދު އެންމެ ފަހުން ހަދާނެ ގޮތް ހުސްވެގެން ޝަކުވާ ހުށަހެޅީ ޓްރާންސްޕޭރަންސީ އިންޓަރނޭޝަންލްގެ ލުބްނާނުގެ ގޮފީގެ ޤާނޫނީ ލަފާދޭ މަރުކަޒަށެވެ. މި ޝަކުވާއަކީ އެ މިނިސްޓްރީއާ ގުޅިގެން ހުށަހެޅުނު ފުރަތަމަ ޝަކުވާއެއް ނޫނެވެ. ޝަކުވާ ހުށަހަޅާ ފަރާތްތައް ތަމްސީލުކުރާ ފަރާތެއްގެ ގޮތުން ޓްރާންސްޕޭރަންސީ އިންޓަރނޭޝަނަލްގެ ލުބްނާނުގެ ގޮފީން މުއައްސަސާތަކާ ގުޅައި ޖަވާބު ހޯދުމަށް ގިނަގުނަ މަސައްކަތްތަކެއް ކުރެއެވެ.

“އަހަރުމެންނަށް ފަންޑުތައް ނަހަމަ ގޮތުގައި ބޭނުންކޮށް ބައެއް އަވަށްތަކަށް ފައިސާ ލިބުނު އިރު އެހެން އަވަށްތަކަށް ނުލިބޭ ސަބަބެއް މުޅީން އޮޅުން ފިލާނެކަމެއް ކަށަވަރެއް ނުކުރެވޭނެ “މަރުކަޒުގައި މަސައްކަތްކުރަމުން އަންނަ ރޭޗަލް ބުންޏެވެ.” އަހަރުމެން މިހާރު މިމަސައްކަތް ކުރަނީ މީހުން ތިބީ އެކަނިމާއެކަނި ނޫންކަން ބުނެދިނުމަށް! އެންމެން އެކަތިގަނޑަކަށް ވެގެން މަސައްކަތް ކުރާތަން ފެނުމުން ޢާއްމުގޮތެއްގައި މުއައްސަސާތަކުން ފިޔަވަޅު އަޅާން ފަށާ”

ރޭޗަލް އިތުރަށް ބުނިގޮތުގައި “އަހަރުމެން މިނިސްޓްރީއަށް މައްސަލަ ހުށަހެޅުމާއެކީ ދެތިން ގަޑިއިރުތެރޭ މިނިސްޓަރ ސީދާ މަރުކަޒުގެ ހޮޓްލައިނަށް ގުޅައި މަރުކަޒުގެ ޤާނޫނީ ލަފާދޭ އެޑްވައިޒަރާ ވާހަކަދެއްކި”

ޓްރާންސްޕޭރަންސީ އިންޓަރނޭޝަންލްގެ ލުބްނާނުގެ ގޮފީން ޒިޔާދަށް އޭނާޔަށް ލިބެންޖެހޭ ފައިސާ ހޯދުމަށް އޭނާގެ އެޕްލިކޭޝަން ކުރިޔަށް ގެންދާނެ ގޮތާއި މެދު މަޝްވަރާކުރިއެވެ. އަދި ފަހުން، ދެހަފްތާއެއްހާ ދުވަސްތެރޭގައި އަވަށުގެ ރައްޔިތުންނާއި މިނިސްޓްރީއާ ދެމެދު ފައިސާ ހޭދަކުރާނެ ގޮތާއި މެދު އެއްބަސްވުމަކަށް އާދެވުނެވެ. 30 އަހަރުވަންދެން ޒިޔާދާއި އޭނާގެ އަވަށްޓެރީން ކެނޑިނޭޅި ކުރަމުން އައި މަސައްކަތް ކާމިޔާބު ވެގެން ދިޔައެވެ. މި އުފާވެރިކަން ފާހަގަ ކުރުމަށް ބޭއްވި ކުލަގަދަ ރަސްމިއްޔާތަށް ޤައުމީ މީޑިއާގެ ސަމާލުކަން ލިބުނެވެ.

އެދުވަހުން ފެށިގެން ބަރީހުގެ ރައްޔިތުންނަށް އެމީހުންނަށް ޙައްޤުވާ ފައިސާ ލިބެމުން ދިޔައެވެ. އަދި އެމީހުންގެ ދިރިއުޅުން އަލުން އާރާސްތުކުރުމުގެ މަސައްކަތް ފަށައި ކުރިޔަށްދެއެވެ. މިހާރު ޓްރާންސްޕޭރަންސީ އިންޓަރނޭޝަނަލްގެ ލުބްނާނުގެ ގޮފީގެ މަޤްޞަދަކަށް ވެފައިވަނީ އެމީހުންނަށް ލިބެންޖެހޭ ފައިސާ ގަވާއިދުން ލިބޭތޯ ބަލައި އެހެން މީހުންނަށްވެސް މިފަދައިން ޢަމަލުކުރުމަށް ހިތްވަރު ދިނުމެވެ.

…………………………………………………………………………………………………………………………………………..

ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ފައިންޑިންގ ދަ ވޭ ހޯމް” މި ލިޔުމުގެ ދިވެހި ތަރުޖަމާއެކެވެ.

މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” އާއެކު ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

https://www.transparency.org/news/story/finding_the_way_home

ނިޔާށާ ރޭޕްކުރި އިރު އޭނާއަކީ ޒިމްބާބުވޭގެ މަދަރުސާއެއްގައި ތަޢުލީމު ޙާޞިލު ކުރަމުންދިޔަ ޢުމުރުން ނުވަ އަހަރުގެ ކުޑަ އަންހެން ކުއްޖެކެވެ.
…………………………………………………………………………………ދުވަސްކޮޅެއް ކުރި ……………….
ގަޑިޖެހިގެން ކިލާހަށް ގޮސްފިނަމަ މުދައްރިސް ރުޅި އަންނާނެތީ އެކަން އެހެން ވިޔަ ނުދިނުމަށް ނިޔާށާއަށް ކުރެވެން އޮތީ އެންމެ ކަމެކެވެ. އެއީ، ގަޑިޔަށް އިސްކޫލަށް ދިއުމަށް ޢާއިލީ ރައްޓެއްސެއްގެ އެހީ ހޯދުމެވެ. ފިހާރައެއްގައި މަސައްކަތްކުރާ ނިޔާށާގެ މައިންބަފައިންގެ ރައްޓެހި މަސައްކަތު މީހެއްގެ ގާތަށް ގޮސް މަދަރުސާއަށް ގެންގޮސްދިނުމަށް އެދުނެވެ. މަސައްކަތު މީހާ ނިޔާށާ މަދަރުސާއަށް ގެންގޮސްދިނުމަށް އެއްބަސްވިއެވެ. އަދި ނިޔާށާދެކެ މުދައްރިސް ރުޅިއައިސްގެން އެއްވެސް އަދަބެއް ނުދޭނެހެން މުދައްރިސާ ވާހަކަ ދައްކާނެކަންވެސް ޔަޤީންކޮށްދިނެވެ. އަދި ފައިވާން ނަގައިގެން އަންނަންދެން އޭނާ މަސައްކަތްކުރާ ފިހާރައަށް ވަނުމަށް އެދުނެވެ. ނިޔާށާ އެތެރެއަށް ވަނުމާއެކީ މަސައްކަތު މީހާ ގަދަކަމުން ނިޔާށާގެ ޢިއްފަތްތެރިކަން ފޭރިގަތެވެ.
މި މަސައްކަތު މީހާއަކީ އެޗް.އައި.ވީ ވައިރަސް އޭނާގެ ހަށިގަނޑުގައި ހުރި މީހެކެވެ. ނަތީޖާއަކަށްވީ މީނާގެ ގައިން ނިޔާށާގެ ގަޔަށް މި ވައިރަސް އެރުމެވެ. ހިތާމަވެރިކަމުގެ ކޮޅެއް ނެތް ވަރުގެ ހިތާމަވެރި އަދި ހިނގައިގެން ނުވާނެފަދަ ހާދިސާއެކެވެ.
ނިޔާށާގެ މައިންބަފައިން ފުލުހުންނަށް މައްސަލަ ރިޕޯޓުކުރުމުން މަސައްކަތު މީހާ ހައްޔަރުކުރެވުނެވެ. ނަމަވެސް! ދެތިން ގަޑިއިރުވެސް ނުވާނެއެވެ! މަސައްކަތު މީހާ ފުލުހުންގެ ބަންދުން ވީއްލައިފިއެވެ! މަސައްކަތު މީހާ ދޫކޮށްލީއެވެ! މިކަމާ ކަންބޮޑުވުން ފާޅުކޮށް އިސް ފުލުސް އޮފިސަރުންނަށް ޢާއިލާއިން އަނެއްކާވެސް މައްސަލަ ހުށަހެޅިއެވެ. އަނެއްކާވެސް މަސައްކަތު މީހާ ހައްޔަރުކުރެވި ކޯޓު މެދުވެރިކޮށް އޭނާ ބަންދުގައި ބެހެއްޓުމަށް ކޯޓުން އަމުރުކުރެވުނެވެ. ނަމަވެސް އަނެއްކާވެސް ވީނުވީއެއް ނޭނގި އޭނާ ގެއްލުނީއެވެ.
ހިތާމަޔާ ކެކުޅުން ތަޙައްމަލު ކުރަމުންދިޔަ ޢާއިލާއަކަށް އޭނާ ފިލައިގެން ދިޔަ ތަނެއް އަދި އޭނާއަށްވީ ކިހިނެއްކަމެއް ބުނެދެވޭނެ އެއްވެސް ފަރާތެއް ނެތެވެ. ޕްރޮސިކިއުޓާއާއި ފުލުހުން އޭނާ ހައްޔަރުކުރާނެ ކަމުގެ ޔަޤީންކަން ޢާއިލާއަށް ދިންނަމަވެސް ހަ މަސް ދުވަސް ފާއިތުވެގެން ދިޔައިރުވެސް މަސައްކަތު މީހާއާ ގުޅުންހުރި އެއްވެސް ޚަބަރެއް ނުލިބެއެވެ.
މިގޮތަށް މީހުން ގެއްލުމަކީ ޒިމްބާބުވޭގައި ގިނަ ރައްޔިތުން އަޖައިބުވާ ކަމެއް ނޫނެވެ. “މިޤައުމުގެ އަމަންއަމާންކަން ހިފެހެއްޓުމުގެ ޒިންމާ މަތިކުރެވިފައިވާ ފުލުހުންގެ ތެރޭގައި ރަނގަޅު އަގެއް ކިޔައިފިނަމަ، ކިތަންމެ ބޮޑު ކުށެއް ކޮށްފައިވާކަމަށް ތުހުމަތު ކުރެވޭ ފަރާތްތައް އެކަމުން ސަލާމަތްވުމަށް އެހީތެރިވެދޭ ބައެއް އުޅޭނެ” ޓްރާންސްޕޭރެންސީ އިންޓަރނޭޝަނަލްގެ ޒިމްބާބުވޭ ގޮފީގެ ފަރާތުން ޢާއިލާއާ ވާހަކަދެއްކި މުވައްޒަފަކު ބުންޏެވެ.
ނިޔާށާއާއި އޭނާގެ ޢާއިލާއަށް އިންޞާފު ހޯދައިދިނުމަށް ޓްރާންސްޕޭރެންސީ އިންޓަރނޭޝަނަލްގެ ޒިމްބާބުވޭ ގޮފިން އެހީތެރިވެދިނެވެ. އެމީހުންގެ ވާހަކަތައް އަޑުއެހުމަށް ފަހު ފުލުހުންގެ އިންޓަރނަލް އިންވެސްޓިގޭޝަން ޑިޕާޓްމަންޓާ މައްސަލަ ޙިއްސާކުރިއެވެ. އަދި މި ޑިޕަރޓްމަންޓުން ހިންގި ތަޙުޤީޤަށް ފާހަގަކުރެވުނު ގޮތުގައި މަސައްކަތު މީހާވަނީ ފުލުހުންނާއި، ޕްރޮސިކިއުޓާގެ އިތުރުން މައްސަލަ ބަލަމުން ގެންދިޔަ ފަނޑިޔާރަށްވެސް، އޭނާ ސިއްރުވެރި ގޮތަކަށް ދޫކޮށްލުމަށް ޝަރުޠުކޮށް ރިޝްވަތުދީފައެވެ.
ޓްރާންސްޕޭރެންސީ އިންޓަރނޭޝަނަލްގެ ޒިމްބާބުވޭ ގޮފިން އެ ޤައުމުގެ މިނިސްޓްރީ އޮފް ޖަސްޓިސް، ލީގަލް އެންޑް ޕާލެމެންޓަރީ އެފެއާޒަށް ވަގުތުން ވަގުތަށް މަސައްކަތު މީހާ ހޯދައި ހައްޔަރުކޮށް ފިޔަވަޅުއެޅުމަށް އެދުނެވެ. ގިނަގުނަ މަސައްކަތްތަކާއެކީ އެންމެފަހުން އޭނާ ހައްޔަރުކުރެވުނެވެ. އަދި އޭނާގެ މައްޗަށް ޝަރީޢަތް ކުރަމުން އައި ފަނޑިޔާރަށް އޭނާ އަނެއްކާވެސް ރިޝްވަތުގެ ފައިސާ ހުށަހެޅިއެވެ. ނަމަވެސް މިފަހަރު ރިޝްވަތުގައި ހިފުމަށް ފަނޑިޔާރު އިންކާރުކުރިއެވެ. އަދި އޭނާގެ މައްޗަށް ޙުކުމް ކުރިއިރު ރިޝްވަތު ދިނުމަށް މަސައްކަތް ކުރުމުގެ ކުށުގައި ފަސް އަހަރު ޙުކުމަށް އިތުރުވެގެން ދިޔައެވެ. މިހާރު އޭނާ ދަނީ 21 އަހަރުގެ ޖަލު ޙުކުމެއް ތަންފީޒުކުރަމުންނެވެ.
ނޯޓު: މި ލިޔުމަކީ ޓްރާންސްޕޭރަންސީ އިންޓަރނޭޝަނަލް އިން އެ ޖަމާޢަތުގެ ވެބްސައިޓުގައި ޝާއިޢުކޮށްފައިވާ، “ޓްރޫ ސްޓޯރީސް” ގެ ތެރެއިން ނަގާފައިވާ “ޕޭރެންޓްސް ނައިޓްމެއާ” މި ލިޔުމުގެ ދިވެހި ތަރުޖަމާއެކެވެ.
މި ލިޔުން ޢިލްމީ، އަދި ކިޔަވައިދިނުމާއި އަދަބީ ބޭނުންތަކަށް، ދޭންޖެހޭ “ކްރެޑިޓް” އާއެކު ބޭނުންކުރުމަކީ އަދި ޝާއިޢުކުރުމަކީ ތަރުހީބުދެވިފައިވާ ކަމެކެވެ.

https://www.transparency.org/news/story/parents_nightmare