ޤާނޫނު ނަންބަރު 2008/13 (އެންޓި-ކޮރަޕްޝަން ކޮމިޝަންގެ ޤާނޫނު) ގެ 21 ވަނަ މާއްދާގެ (ރ) ގައި “ކޮރަޕްޝަންގެ ގެއްލުމާއި ނުބައިކަމުގެ މައްޗަށް ޢާންމުން ހޭލުންތެރި ކުރުވައި، ދައުލަތް ހިންގުމުގައި ތެދުވެރިކަމާއި އަމާނާތްތެރިކަން ކުރިއެރުވުން” މިކޮމިޝަންގެ މައްޗަށް ލާޒިމްކޮށްފައިވެއެވެ. މުޅި ދައުލަތުގެ ނަޒާހަތްތެރިކަން ކުރިއެރުވުމުގެ ޤާނޫނީ ޒިންމާ މިކޮމިޝަނާ މަތިކުރެވިފައިވާ ހިނދު، މިކޮމިޝަންގެ މަސައްކަތްތަކުގެ ތެރެއިން ނަޒާހަތްތެރިކަން ދައުލަތުގެ ނިޒާމްތަކުގެ ތެރެއަށް ގެނައުމުގެ މަސައްކަތް ކުރުމަށް މިކޮމިޝަނުން އިސްނެގުމަށް ނިންމައި، ކުރިޔަށް އޮތް 05 އަހަރަށް އަމާޒުކޮށްގެން ނަޒާހަތްތެރިކަމުގެ ޤައުމީ ޕްލޭނެއް އެކުލަވާލުމަށް ކަނޑައެޅުނެވެ.